خلصتها الساعة 6 الصبح!! أكرم حسني يكشف تفاصيل مثيرة لأغنية “تيجي نسيب” لأنغام

4 أشهر منذ

كريم احمد الحسيني

كشف الفنان أكرم حسني عن تفاصيل صناعة أغنية تيجي نسيب لأنغام وهي الأغنية التي حمل ألبومها اسمها.

فقد نشر أكرم حسني فيديو للملحن إيهاب عبدالواحد وهو يغني تيجي نسيب على الجيتار وعلق على مقطع الفيديو عبر حسابه الرسمي على تطبيق انستغرام قائلًا: “يوم التلات 2 نوفمبر 2021.. الساعة أربعة الفجر… قام إيهاب عبد الواحد عشان يمشي بعد سهرة طويلة عندي في البيت إيهاب مسابش فيها الغيتار من إيده هو بيغنّي وكلنا بنغنّي معاه”.

وتابع: “بعد ما كله مشي جاتلي فكرة أغنية “تيجي نسيب” فكتبتها وخلّصتها على الساعة ستة الصبح، وهموت وأكلم إيهاب عشان يجيلي يسمعها ويلحّنها بس مكسوف أكلّمه… الراجل لسه ماشي من عندي من ساعتين وأكيد ملحقش ينام. الساعة سبعة الصبح بعد ما قدرت أمسك نفسي لمدة ساعة كاملة اتصلت بيه فردّ بصوت غرقان في النوم“.

حوار مثير “للضحك” بين أكرم حسني وإيهاب عبدالواحد بسبب أغنية “تيجي نسيب”!

ونشر أكرم حسني الحوار الذي دار بينه وبين إيهاب عبدالواحد وهو:

أكرم: صباح الفل يا بوب… صحيت؟

إيهاب: لا لسه… أنا نايم من ساعتين بس… في حاجة؟

أكرم: لا يا حبيبي مفيش… خلاص اصحى وكلّمني

الساعة سبعة وربع اتصلت تاني

أكرم: إيه يا بوب صحيت؟

إيهاب: أكرم أنت كويس؟

أكرم: آه يا معلم تمام بس أصلي كتبت حاجة كده وحاسس إنها حلوة فعايز أسمّعهالك

إيهاب (بحماسة): لا إن كان كده هفوق وألبس وأجيلك.

أكرم: يالا مستنيك

الساعة سبعة ونص اتصلت بيه

أكرم: بوب قهوتك إيه؟

إيهاب (بعصبية): أكرم… والله العظيم بفوق وهاجي

أكرم: ماشي يا حبيبي مستنّيك

الساعة تسعة إيهاب وصل

أكرم: بوب أنا كتبت أغنية فرحان بيها أوي….

وأضاف: “من الساعة تسعة للساعة اتناشر إيهاب مبيعملش حاجة غير إنه ماسك الغيتار وعمال يجرب جمل لحنية في دماغه ويطلب قهوة سادة. الساعة اتناشر وعشر دقايق كان خلّص اللحن وبيسجّله (بصوا الساعة اللي ورا عشان تتأكدوا) ومكانش يعرف إني لما قولتله وهو ماشي الفجر عايزين نكررها قريب إنها هتبقى قريب أوي كده”.